నాన్న చెప్పిన నీతి

*****
*నాన్న చెప్పిన నీతి*
=============
(మినీ కథ)

(నేను రాసిన ఈ మినీ కథ నిత్య అనే మాసపత్రికలో మార్చి 2022 సంచికలో
ప్రచురితమైనది)

రచన ::
బుద్ధవరపు కామేశ్వరరావు
హైదరాబాద్

"ఒరే సుబ్బూ! ఇండియా రాజధాని ఏది?"

"ఢిల్లీ రా విస్సూ"

"మరి బీహార్ రాజధాని?"

"పాట్నా"

"ఇవన్నీ ఎవరు చెప్పార్రా?"

"నాన్నగారు చెప్పారు"

***** ***** ***** *****

"ఒరే సుబ్బూ! రెసిడెన్షియల్ స్కూల్లో చేరుతున్నావుట?"

"ఔనురా విస్సూ"

"ఈ స్కూల్లో బాగానే చెబుతున్నారుగా?"

"అక్కడ ఇంకా బాగా చెబుతారుట"

"ఎవరు చెప్పారు?"

"నాన్నగారు చెప్పారు"

***** ***** ***** *****

"సుబ్బూ! మీ తాతగారిని వృద్ధాశ్రమంలో చేర్పించారుట?"

"ఔను, వృద్ధులకు ఇంట్లో కన్నా అక్కడే సదుపాయంగా ఉంటుందిట్రా విస్సూ"

"ఎవరు చెప్పారు?"

"నాన్నగారు చెప్పారు"

***** ***** ***** *****

"ఏరా ! సుబ్బూ! ఇంక పై చదువులు మానేసి, ఉద్యోగంలో చేరిపోయావుట?"

"ఔనురా! ఉద్యోగం చేస్తూ ఉన్నత విద్య అభ్యసిస్తే మంచిదిట!"

"ఎవరు చెప్పారు?"

"నాన్నగారు చెప్పారు"

***** ***** ***** *****

"సుబ్బూ! రాధను కాదని లక్ష్మిని ఎందుకు పెళ్లి చేసుకుంటున్నావ్?"

"లక్ష్మి వాళ్ళ నాన్న కోటీశ్వరుడుట. ఆయన తదనంతరం ఆ ఆస్తి అంతా మాకేనట"

"ఎవరు చెప్పారు?"

"నాన్నగారు చెప్పారు"

***** ***** ***** *****

"సుబ్బూ! పాపం మీ నాన్నను వృద్ధాశ్రమంలో చేర్పించావుట?"

"ఔను, వృద్ధులకు ఇంట్లో కన్నా అక్కడే సదుపాయంగా ఉంటుందిట్రా విస్సూ"

"ఈ విషయం నీకు ఎప్పుడు తెలిసింది?"

"మా తాతగారిని ఓల్డ్ ఏజ్ హోమ్ కి పంపినపుడు"

"అప్పుడు ఎవరు చెప్పారు?"

"నాన్నగారు చెప్పారు"

***** **సమాప్తము** *****